KIBADENI AMUITA HUMUDI

Kiungo mkabaji wa zamani Azam FC, Abdulhalim Humoud ameibukia Simba akisaka nafasi ya kusajili kwa ajili ya msimu ujao wa Ligi Kuu Bara.

Humoud aliyemaliza mkataba wake na Azam FC Mei, mwaka huu na kwenda Afrika Kusini kufanya majaribio ya kucheza soka la kulipwa na klabu ya Jomo Cosmos, yuko kambi ya Simba iliyopo, Kigamboni, Dar es Salaam.

Akizungumza na gazeti hili  jana, Makamu Mwenyekiti wa Simba, Joseph Itang’are alithibitisha mchezaji huyo kuwepo kwenye kambi ya timu yake akisaka nafasi kwa ajili ya msimu ujao wa ligi,  Agosti 24.

Itang’are alisema kuwa Kocha Abdallah Kibadeni ndiye aliyemtaka mchezaji huyo anayedaiwa kufuzu na klabu ya Jomo Cosmos.

“Kocha ndiye ametaka aje kambini kufanya mazoezi na timu ili aweze kujiridhisha na kiwango chake kabla ya kusaini mkataba,” alisema na kuongeza.

“Kamati ya Usajili Simba, tunasubiri kauli ya mwisho kutoka benchi la ufundi na kufanya naye makubaliano ya kusaini mkataba.”

Kocha Mkuu wa Simba, Abdallah Kibadeni alisema jana kuwa, yuko kwenye kambi ya Simba kwa siku tano sasa akifanya mazoezi na wachezaji wenzake.

“Maendeleo yake ni mazuri ingawa siwezi kusema lolote kwa sasa. Ni mchezaji ambaye namjua vizuri, siyo mgeni kwangu. Pia najua aliwahi kuichezea Simba kipindi cha nyuma kabla ya Azam FC.” alisema Kibadeni.

Humoud alipofuatwa na gazeti hili baada ya kumaliza mazoezi alisema: “Sitaki kuzungumza lolote kwa sasa, ni mapema.”

Humoud alijiunga na Simba akitokea Mtibwa Sugar na kutolewa kwa mkopo na klabu hiyo kwenda Azam FC.

Wakati huohuo, mshambuliaji wa Mtibwa Sugar, Hussein Javu amejiunga na mabingwa wa Tanzania Bara, Yanga na jana asubuhi alifanya mazoezi.

Javu aliyekuwa akitolewa macho na Simba, amejiunga na Yanga kwa mkataba wa miaka miwili mpaka mwaka 2015.

Kusajiliwa kwake ina maana, Yanga haina tena mpango wa kumsajili mshambuliaji  wa kimataifa kutoka Nigeria, Ogbu Brendan.

Mmoja wa viongozi wa Yanga ambaye hakutaka jina lake kuandikwa kwenye gazeti kwa kuwa siyo msemaji, alithibitisha kusajiliwa kwa Javu

UCHAGUZI MKUU WA TFF HATARINI KUFANYIKA TENA

Siku ya leo ndio siku ambayo ilitakiwa fomu za kugombea uchaguzi wa mkuu wa TFF zilipaswa ziwe zimeanza kutolewa lakini mpaka sasa hakujawepo na tangazo lolote kutoka TFF kuhusu uchukuaji fomu kwa wagombea watakaopendelea kugombea nafasi mbalimbali kwenye uchaguzi huo.

Mtandao huu ulijaribu kufanya uchunguzi kufuatilia nini tatizo nyuma ya uchelewaji huu wa kuanza mchakato wa uchaguzi, tukaja kugundua kwamba tatizo ni kwamba katiba iliyofanyiwa marekebisho na mkutano mkuu wa TFF hivi karibuni imekataliwa kusajiliwa na msajili wa vyama vya michezo.

Kwa mujibu wa uchunguzi wetu katiba ya TFF imekataliwa kusajiliwa na msajili kutoka na kutokidhi vigezo vilivyowekwa kwa ajili ya katiba kuwa halali kusajiliwa.

Kisheria ili katiba ipate uhalali wa kusajiliwa na msajili inabidi ufanyike utaratibu wa kupigiwa kura na wajumbe wa mkutano mkuu wa TFF na baada ya hapo 2/3 ya wajumbe wapitishe mabadikiko ya katiba hiyo ndipo itakapopata uhalali wa kusajiliwa na msajili wa vyama vya michezo.

Kingine kilichokwamisha usajili ni kitendo cha TFF kuteua kamati mbali mbali mpya kabla ya katiba kusajiliwa. Sasa waliteua kamati kwa kutumia uhalali wa kamati gani?

NAGOMBEA UENYEKITI SIMBA

Aliyekuwa Makamu Mwenyekiti wa Simba, Geofrey Nyange ‘Kaburu’ amesema kuwa anafikiria kugombea uenyekiti wa klabu hiyo katika uchaguzi ujao.

“Kweli mimi si kiongozi wa Simba kwa sasa, lakini ni mwanachama wa Simba na kikatiba nina haki ya kuendelea kuitumikia klabu yangu bila kipangamizi chochote hata kuwa Mwenyekiti wa klabu, haimanishi mimi kujiuzulu ndio mwisho wa kuwa kiongozi katika Simba, katiba hainizuii hivyo naweza kurudi na kuifanyia kitu klabu yangu kama kiongozi.”

Kaburu alisema kujiuzulu kwake kama kiongozi ilitokana na kutaka kupumzika na  kujipanga upya.

 “Watu wasiwe na hofu, ninakuja upya na wakati huu nitaangalia matatizo mbalimbali na kuyasuluhisha ili klabu kama klabu ifanikiwe,”alisema.

“Sasa nimetoka kwenye uongozi, nafikiri bado mimi mwanachama wa Simba naruhusiwa kutoa maoni yangu au hata saa zingine kuisaidia Simba kwenye mambo mbalimbali,” alisema Kaburu, ambaye kuonekana kwake mazoezi katika siku za karibuni kuliibua mjadala kwa mashabiki.